Skip to content
Verklagnir

This page hasn't been fully translated to your selected language yet. Anything missing is shown in Icelandic.

Hvernig virka varmadælur?

Varmadæla býr ekki til hita — hún flytur hann. Hér er hringrásin sem gerir það mögulegt, hlutarnir sem koma við sögu og ástæðan fyrir því að dælan skilar margfalt meiri varma en raforkunni sem hún notar.

Það hljómar eins og galdur að ná varma úr köldu útilofti á janúarmorgni, en þetta er sama eðlisfræði og heldur ísskápnum köldum — bara á hinn veginn. Ísskápurinn tekur varma innan úr skápnum og skilar honum út í eldhúsið. Varmadæla tekur varma úr útiloftinu, vatni eða jörðu og skilar honum inn í húsið.

Lykillinn er kælimiðillinn: vökvi sem sýður við mjög lágt hitastig. Jafnvel í frosti er útiloftið nógu heitt til að sjóða hann, og um leið og hann sýður er varminn kominn inn í kerfið. Þá er bara eftir að þjappa honum saman þar til hann er orðinn nógu heitur til að nýtast.

Varmadæla er ekki rafmagnsofn með viftu. Rafmagnið knýr þjöppuna, en varminn sjálfur kemur að langstærstum hluta úr umhverfinu — og hann er ókeypis.

Hringrásin í fjórum þrepum

Kælimiðillinn fer endalaust sömu hringrásina á meðan dælan gengur. Fylgdu línunni niður.

  1. 1. þrep

    Uppgufun — varminn er sóttur

    Kaldur kælimiðill í fljótandi formi rennur um varmaskipti í útieiningunni. Vifta dregur útiloftið yfir varmaskiptinn, og af því að kælimiðillinn er enn kaldari en loftið færist varmi úr loftinu yfir í hann. Við það sýður hann og verður að gasi. Loftið sem blæs út aftur er nokkrum gráðum kaldara en það var.

  2. 2. þrep

    Þjöppun — varminn er magnaður upp

    Gasið fer inn í þjöppuna, sem er eini hluti kerfisins sem notar umtalsvert rafmagn. Hún þjappar gasinu saman og við það rjúka bæði þrýstingur og hitastig upp. Þetta er sami varminn og áður, en nú á nógu háu hitastigi til að nýtast til upphitunar.

  3. 3. þrep

    Þétting — varminn er afhentur

    Heita gasið streymir í varmaskipti innandyra og gefur þar frá sér varmann. Í loft í loft kerfi blæs innieiningin honum beint út í rýmið; í loft í vatn kerfi fer varminn í vatnið sem rennur um ofna, gólfhita eða neysluvatnstank. Um leið og kælimiðillinn lætur varmann af hendi þéttist hann aftur í vökva.

  4. 4. þrep

    Þensla — byrjað upp á nýtt

    Vökvinn fer í gegnum þensluventil sem lækkar þrýstinginn snögglega. Við það kólnar hann niður fyrir útihitastigið og er aftur tilbúinn að taka við varma. Hringrásin hefst á nýjan leik og heldur áfram á meðan dælan gengur.

Varmadælan í tölum

3–5×
meiri varmi en raforkan sem fer inn

dæmigert; lækkar eftir því sem kólnar úti

A+++
hæsta orkuflokkun sem dælur ná

á bestu gerðunum

R32
kælimiðill í nýrri dælum

hlýnunarmáttur 675 á móti 2.088 hjá eldri R410A

1 kerfi
hitar, kælir og þurrkar

sami búnaðurinn allt árið

Hlutarnir sem mynda kerfið

Hvaða einingar eru til staðar fer eftir gerð kerfisins, en þessar eru þær sem oftast koma við sögu.

  • Útieining

    Hjartað í kerfinu: þjappan, varmaskiptir og vifta. Sækir varmann út í loftið á veturna og losar hann þangað á sumrin.

  • Innieining

    Í loft í loft kerfi blæs hún varmanum eða kuldanum inn í rýmið og síar loftið um leið. Fæst á vegg, í loft eða falin í kerfi.

  • Vatnseining

    Í loft í vatn kerfi tekur hún við varmanum frá útieiningunni og hitar vatnið sem fer út í lagnakerfi hússins.

  • Neysluvatnstankur

    Geymir heita vatnið til daglegrar notkunar. Algengar stærðir fyrir heimili eru á bilinu 200 til 260 lítrar.

  • Kælimiðilslagnir

    Einangraðar koparlagnir milli eininganna. Það eru þær sem raunverulega bera varmann á milli úti og inni.

  • Stýring

    Stjórnborð á vegg eða app í símanum: hitastig, tímastillingar og yfirsýn yfir orkunotkunina.

Af hverju skilar hún meiru en hún notar?

Raforkan fer ekki í að búa til varma heldur í að flytja hann, og þess vegna er hægt að fá meira út en sett er inn. Hlutfallið þarna á milli er kallað COP — nýtnistuðull.

  • Bein rafhitun skilar í mesta lagi einni orkueiningu fyrir hverja sem hún fær
  • Varmadæla skilar dæmigert þremur til fimm
  • Hlutfallið lækkar þegar kólnar úti, því þá er minni varmi að sækja í loftið
  • Þess vegna er dælan valin út frá mesta álaginu en ekki meðalveðrinu — of lítil dæla eyðir vetrinum á versta sviðinu sínu

Algengar spurningar

Achieve maximum energy savings

Contact

We find the most cost-effective solution for you!

Contact us and book a free consultation with heat pump specialists.